U'Rwanda ku mwanya wa 119 ku rutonde rwa FIFA

Igihugu cy'Urwanda kiri ku mwanya wa 119 ku rutonde rwa FIFA rwasohotse iki gitondo i Zurich, Switzerland.

U'Rwanda rwamanutse imyanya 14 ruva ku 105 rugera ku 119 nyuma yo gutsindwa umukino ubanza w'amajonjora y'igikombe cy'isi kizabera i Brazil muri 2014.

Ikipe y'igihugu y'Amavubi yatsinzwe na Algeria ibitego 4-0 i Algiers nyuma y'iminsi mike itsinzwe ibitego 5-0 na Tunisia mu kwezi kwa gatanu mu mukino mpuzamahanga wa gicuti.

Indi mikino ya gicuti yakinywe mu kwezi kwa gatanu harimo 2-0 bya Libya na 1-1 ku mukino wa Chad.

Ubu igihugu cy'urwanda kiri ku mwanya wa 35 muri Afurika ndetse kikaza nyuma ya Uganda, Sudan na Kenya ziri ku myanya ya 94, 101 na 111 muri Cecafa.

Ikipe ya Benin izahura n'ikipe y'Amavubi iki cyumweru mu mukino wa kabiri wo gushaka tike y'igikombe cy'isi yazamutse imyanya 52 ijya ku myanya wa 72 kw'isi.

Cote d'ivoire iracyoboye urutonde rwa Afurika ndetse ikaba iri ku mwanya wa 16 kw'isi hanyuma Spain niyo iyoboye yambere kw'isi nkuko urutonde rwa FIFA rubigaragaza.