D2: Musanze FC yegukanye igikombe kuri Penaliti

Kuwa Gatandatu tariki ya 19/05/2012 kuri Stade Amahoro i Remera habaye umukino wa nyuma mu cyiciro cya kabiri, aho amakipe abiri yamaze kubona itike yo kuzamuka mu cyiciro cya mbere, yarimo ahatanira igikombe.

AS Muhanga na Musanze FC umukino ugitangira buri kipe yari ifite ishyaka ryo kuba yasahakisha igitego, nubwo AS Muhanga ariyo yabonye uburyo bwinshi bwo kugera ku izamu ariko ntiyabubyaza umusaruro, igice cya mbere kiri hafi kurangira, Musanze Fc yabonye igitego cyatsinzwe neza na Habineza.

Igice cya mbere cyarangiye AS Muhanga 0 kuri Kimwe cya Musanze FC.

Mu gice cya kabiri AS Muhanga yaje ishaka kwishyura uburyo nka bubiri yabonye ntiyabasha kubona igitego, Rutahizamu wa Musanze FC Nyandwi Jaques yaje kwinjiza igitego cya kabiri ku mutwe.

AS Muhanga yaje kubona penaliti maze yinjizwa neza, AS Muhanga nyuma yo kubona igitego yongereye ingufu ishakisha igitego cyo kwishyura, igitego cyaje kuboneka gitsinzwe n’umukinnyi winjije Penaliti.

AS Muhanga mu minota ya nyuma yatatse izamu rya Musanze FC cyane, umukino urangira amakipe yombi anganya ibitego 2-2.

kugirango igikombe kibone nyiracyo hongereweho iminota 30, Musanze FC yatangiye isatira ariko abinyuma ba AS Muhanga bakitwara neza, iminota 15 ibanza yarangiye nta gihindutse amakipe yombi anganya ibitego 2-2.

Iminota 15 ya nyuma y’umukino amakipe yombi yatangiye afite inyota yo gushakisha igitego, byabaye ngobwa ko hatswa amatara kuko bwari bumaze kwira, bigaragara yuko abakinnyi benshi mu bari mu kibuga aribwo bari bakinnye ni njoro ku matara.

Iminota 120 y’umukino yarangiye nta kipe ibashije gutsinda indi amakipe yombi anganya ibitego 2-2, hitabazwa penaliti.

Penaliti 5 zibanza amakipe yarangije anganya nyuma yo kwinjiza penaliti 4 kuri 4. Musanze FC yegukanye igikombe nyuma yo kwinjiza penaliti 5 kuri 4.

Inkuru dekesha ruhago yacu